Gin-alegar NPA, patay sa engkwentro sa Binalbagan; mga klase sa mga eskwelahan kag day care centers malapit sa lugar, suspendido bangud sang insidente
Patay ang isa ka gin-alegar katapo sang New People’s Army sa engkwentro sa tunga sang mga rebelde kag miyembro sang 94th Infantry Battalion sang Philippine Army sa Sitio Apitong, Barangay Biao, banwa sang Binalbagan, mga las 2 kaina sang kaagahon.
May initial na nga identity sa napatay nga gin-alegar miyembro sang hublag apang wala pa makapagwa sang opisyal nga pahayag ang militar.
Suno sa Army, mga lima ka rebelde ang ila na-engkwentro kag naglawig sang 10 ka minutos ang pagbayluhanay sang lupok.
May na recover nga M16 rifle, mga bala kag personal nga pagkabutang sa lugar.
Sa interview sang media kay Barangay Captain Junefel Aguillon, iya ginsiling nga indi ini una nga tion nga may engkwentro sa lugar bangud sang tinalikdan nga mga tinuig, may nagluntad man nga encounter sa Sitio Apitong.
Bangud sang engkwentro subong nga adlaw, nagpagwa sang executive order ang Brgy. Bi-ao nga naga-suspende sang klase sa tanan nga mga eskwelahan malapit sa lugar para sa safety sang mga estudyante kag manunudlo.
Lakip sa mga gin-suspend ang klase subong nga Biyernes amo ang Binadlan Elementary School, Bulwang Elementary School, Nasanagan Elementary School, Biao Elementary School, Biao National High School kag tanan nga day care centers.*
[sibwp_form id=1]