Nagatagiti man ang init kag bisan naga ulan, wala naga untat ang 57 anyos nga si Roberto Castro nga mas kilala nga si Rambo sa iya paglibod sang taho sa Bacolod.
Ang iya mabukod nga panglawason kag masami pagsuksok sang camouflage nga panapton isa sa mga kabangdanan nga ginhingadlan siya nga Rambo.
Luyag kuntani ni Rambo nga mangin isa ka pulis pero napaslawan siya.
Pero ang mabukod nga lawas kag kusog ang iya ginagamit indi lang sa paghakwat sang binagtong nga taho kundi pati man sa kampanya kontra kriminalidad, ilabi sa iligal nga droga bilang executive officer sang tanod sa Barangay 29.
Nangin anay boksidor man si Rambo sang dekada nubenta.
Suno sa iya masami siya nga makabaton sang mga pagpanghangkat sa dalan. Pero mas ginapili niya nga magrekta na lang lakat para makalibod sang taho.
Ok na kay Rambo nga mapauli ang masobra sa kinyentos pesos nga kinitaan para man sa kinahanglanon sang pamilya sa matag adlaw.
May pito ka mga kabataan si Rambo kay may walo naman ka mga apo.
Pero sa iya nga edad wala siya nagakalipat nga mag exercise.
Nagapati si Rambo nga importante ang pag halong sa ikaayong lawas agud man bisan paano makapadayon siya sa pagserbisyo kag mahatag ang mga kinahanglanon sang iya nga pamilya.