Mga Fruit vendors sa downtown area sang Bacolod ang ginapangitaan sang masayluhan.
Magluwas sa igapatuman nga clearing operation sang City Legal Office enforcement team sa mga sidewalk sa downtown area may plano man ang Bacolod LGU nga tipunon sa isa ka lugar ang mga fruit vendors.
Ginsiling ni Councilor Celia Flor, pamuno sang Committee on Markets and Slaughterhouse, naduso sa local market committee meeting nga mabutang ang mga fruit vendors sa dalan Bonifacio nga yara lang sa kilid sang Central Market.
Pero ginpahayag ni City Legal Officer Atty. Romeo Carlos Ting, Jr. nga indi pwede nga gamiton ang dalan bilang permanente nga baligyaan.
Gani ginapaligban karon sang katapo sang Local Market Committee kun diin sarang isaylo ang may 13 tubtob 15 ka mga vendors.
Na-istoryahan man sa pagsinapol ang pagtalana sang night market sa Araneta Street kag Fr. Ferrero Street. Sa Fr. Ferrero Street ibutang ang dugang nga baligyaan sang mga manokan vendors nga maapektuhan sang natalana nga construction sang bag-o nga Manokan Country.
Samtang sa Araneta Street ginaplano nga tagaan higayon ang mga magagmay nga negosyante ilabi na mga sidewalk vendors sa downtown area.