Patay ang anay commander sang RPA-ABB matapos nga gintiro sa Barangay Rizal, sa San Carlos City kahapon sang udto.
Suno kay Lt Col Jesus Mesahon, Jr., hepe sang San Carlos City Police Station, ang biktima ginkilala kay Alejandro Traya alyas “Andot” 62 anyos kag residente sang Barangay Pinowayan, banwa sang Don Salvador Benedicto.
Sa imbestigasyon sang San Carlos PNP, ang biktima kag ang suspek ang naga estambay lang sa amo nga lugar.
Hinali lang gintiro sa likod si Traya nga gintunaan sang iya kamatayon.
Dugang pa sang pulis, sa ginpatigayon nga pursuit operation sang kapulisan na-recover ang motorsiklo nga gin gamit sang suspetsado sa pagpalagyo.
Ginkumpirma man sang hepe, nga si Traya isa ka anay katapo sang NPA kag nangin RPA kag pinagi sa pagbalik niya sa sabak sang gobyerno natagaan ini sang trabaho bilang katapo sang forest guard sang DENR.
Nagadapayon ang imbestigasyon sang PNP para makilala ang sa likod sang pagpatay sa iya pati na ang motibo sa krimen.