Sa tunga-tunga sang sini nga Agosto magasugod na operate ang Negros Occidental Negros Food Terminal Market.
Isa ini sa idalom sang Economic Enterprise Development Department nga gina padali ni Governor Eugenio Jose Lacson sa paglaum nga makabulig sa local income sang probinsya sa tunga sang ginalantaw matabo nga pagnubo sa budget bilang epekto man sang P780M nga buhin gikan sa National Tax Allotment.
Suno kay Provincial Administrator Rafyrando Diaz, sini na nga adlaw ang contract signing para sa mga maga renta sang stalls. May 56 ka lessee sa fish, vending kiosks, meat and poultry, bagsakan, fruits and vegetables, dry goods kag tulahan. Libre ang renta sa fit out period. Ang sa tulahan ang may pinakalawig nga fit out period – mga isa ka bulan.
Magluwas sa food terminal, naga ayo naman ang ganar sang CyberCentre nga may 60 million pesos na nga na income sa sulod sang pito ka bulan.
Yara pa lamang sa soft opening ang Negros Residences nga sa karon may kalay-uhon pa. Padayon man ang ganar sang Mambukal Resort and Wildlife Sanctuary nga suno kay Diaz may mga tion nga fully booked.
“It’s really about time for the EEDD to generate income. A lot of funds have been provided for that department. So naturally the income that was expected from it based on its business plan should be realized. Kun mag lapaw pa gid siya sa target based on the business plan so much the better”, suno kay Diaz.
Sa pihak nga bahin, Enero pa na aprobahan sang Sangguniang Panlalawigan ang kontrata ni Mayor Albee Benitez bilang economic consultant sang probinsya pero wala na niya ini ma pirmahan.
Mahimo suno kay Diaz, tungod sang delicadeza, gin paiway ini sadto ni Benitez bangud sang ginapaabot nga piniliay. Suno kay Diaz, karon nga alkalde na siya mahimo wala na siya sang tiempo para maglantaw sini pero wala sang problema ang koordinasyon sang probinsya kay Mayor Albee bisan wala na sang consultancy.
“Even without the consultancy status, ang coordination and cooperation with Mayor Albee is still 100 percent. Kun ang business and economic advantages pasudlon sa Negros Occidental and Bacolod, we will always consult with each other”, suno kay Diaz.