Dead on arrival sa ospital si Alejandre Brotarlo kag iya nobya nga si Queenie Rocaberte matapos mabunggo kahapon sa naga sugata nga truck ang ila salakyan sa Osmena Avenue sa Barangay 13 sa Victorias City.
Suno kay Col Joseph Fajardo, hepe sang Victorias PNP, padulong sa norte ang salakyan nga dala sang mag nobyahanay sang hinali madulaan sang kontrol ang driver kag ini ang nag bunggo sa naga sugata nga truck sa pihak nga lane. Madasig ang pagpadalagan ni Brotarlo sang awto suno sa pulis.
Si Brotarlo ang taga Roxas City kag nag bisita lang sa Negros kun sa diin naga istar ang iya nobya nga si Rocaberte nga manuglakat na tani sa luwas.
Gin pahayag man ni Fajardo nga ila man usisaon kun bala may iban pa nga kabangdanan kun ngaa natabo ang aksidente kaangay na lang sa mga alegasyon nga naga gwa sa social media nga kuno gin hungod sang nobyo ang pag bunggo sa truck.
May initial settlement naman suno kay Fajardo sa driver sang truck kag sa pamilya sang mga biktima gani indi naman ini pag pasakaan pa sang kaso.