Red zone program nga ginapatuman sa Bacolod para mapabaskog ang Fire Prevention campaign ang ginatuyo nga ipatuman nationwide sang DILG.
Sa paghinun-anon nanday Congressman Albee Benitez kag DILG Secretary Jonvic Remulla upod sa Bacolod Bureau of Fire Protection na-presentar sang anay alkalde ang ginapatuman nga red zone program nga nagpabaskog sang kampanya sang siudad kontra sunog ilabi na sa mga ginakabig fire prone areas.
Sa natukod nga Red Zone Program sang Bacolod LGU na-identify ang masobra 190 ka mga red zones ukon mga lugar nga ikit-ikit ang pamalay kag indi mahapos ma-access sang mga responding units kasubong sang bombero kag fire and rescue volunteers.
Ini ang natagaan atensyon sang siudad paagi sa ginpasanyog nga fire prevention program kabangdanan nga nagnubo ang kadamuon sang nagluntad nga sunog.
Ginsiling ni City Fire Marshall Fire Superintendent Jenny Mae Masip nga tungod sang nakabig epektibo nga programa, luyag ni Secretary Remulla nga mapatuman ini sa pila pa ka mga banwa kag siudad sa pungsod.
Ang Bacolod ang magaserbe nga modelo sa pagpatuman sang ginapaabot nga nationwide program kontra sunog.
Samtang, nagpasalig man ang pamuno sang DILG para sa dugang nga equipment kag pasilidad sang Bacolod BFP, labi na ang ladder truck nga ginalauman mas makapabaskog sang fire emergency and rescue response sang mga bombero sa siudad.