Banwa sang Candoni ang nagpadala man sang sulat sa kumbuyahan nga naga operate sang palm oil plantation sa banwa nga nagapauntat sa ila sang ila nga operation tubtob nga sila ang maka comply sa mga rekisitos nga gina pangayo sa ila.
Suno kay Mayor Ray Ruiz, nabaton na sang Hacienda Asia Plantations, Inc., ukon Hapi ang ila ginpadala nga final notice, nga dapat temporaryo anay mag untat sa palm oil operation lakip na sa earthmoving activities.
Paathag ni Ruiz, maka pila naman gin padal-an sang notice ang HAPI base man sa resulta sang monitoring sang Multi-Partite Monitoring Team, ugaling wala sila sa gihapon maka comply.
“Nagpadala ko sulat sa ila, depende naman na sa ila kun ano ang ila response kag kun ano ang pag interpret nila sang sulat nga ginpadala ko sa ila. Basta importante may ara man ya response ang LGU separately”, suno kay Ruiz.
Nag padala na sang ila nga technical staff ang Environment Management Bureau 6, bilang sabat sa sulat ni Negros Occidental Governor Eugenio Jose Lacson angut sa non-compliance sa ECC sang HAPI kasubong man sa ila sini nga earthmoving activities sa duta sakop sang Integrated Forest Management Area ukon IFMA.
Naghinyo ang probinsya sa pagpapanaog sang Cease and Desist Order sa EMB6 batuk sa HAPI bangud sila ang may authority bahin diri.
Suno kay Forester Vicente Losbañes pamuno sang Enforcement Division sang EMB 6 sila ang magapatigayon sang verification kag naga hulat sila sang report sang ginpadala nila nga technical staff.
Si Governor Lacson ang nag sulat naman sa kay DENR Sec Raphael Lotilla nga mag patunga para ma settle na ang issue.
Suno kay Losbañes, sa June 17 pa maga pungko si Lotilla.
Naga laum si Mayor Ruiz nga sa mas madali nga panahon kuntani ma settle naman ang issue.
May 700 man ka mga pumuluyo sang Candoni ang nahatagan sang trabaho paagi sa amo nga proyekto.
“Mas mayo gani nga as early as possible ma settle na na. Kabalo gid ko nga kun mag untat na kadamo da sang trabaho nga mag untat. Almost 700 man da ang mga trabahante nga naga obra da subong”, suno kay Ruiz.