Indi na ma-locate sang National Bureau of Investigation ang Chinese-looking nga babaye nga gin-alegar nagpangpicture sang mga driver’s license kag national ID sang mga pumuluyo sa boundary sang Barangay Estefania kag Barangay Vista Alegre sa Bacolod City.
Suno kay Atty. Jose Gabriel, Jr., Executive Officer sang NBI-Bacolod, ila ginahibalo ang address sang amo nga babaye, nga bisan Chinese-looking makahibalo mag-Hiligaynon, para mapa-receive ang subpoena batok sa iya.
Wala na ini nagapauli sa gina-rentahan nga apartment kag wala naman ini nagabisita sa iya nga store humalin sang nagwa ang balita may angut sa ginhimo sini nga pagpang-picture sang mga driver’s license.
Suno kay Gabriel, nakuhaan na nila sang statement ang 11 sa 13 ka mga persona nga biktima sang pagpang picture sang ID kag iya naman ginahanda ang complaint affidavits sang mga ini.
Nagkooperar sila matapos ginpaathag sang NBI ang posible nga mga konsekwensiya sang pagkuha sang picture sang ila nga lisensiya, ilabi na kun gamiton ini sa pagpanunto.