Sang kahapon nakig sugilanon ang Filipino-Chinese community sa Bacolod sa kay Mayor Greg Gasataya kag sa Bacolod City Police Office.
Ini kasunod sang natabo nga pagpatay sa Filipino-Chinese businessman nga si Engr. Romie Li.
Suno sa alkalde, ginpahibalo ang mga negosyante sang update sa kaso pati na ang confidential information angut sa identity sang gun-for-hire nga amo ang nag patay sa negosyante.
Ginpahibalo sila sang update sa lakat sang imbestigasyon sa kaso.
Dugang pa sang alkalde, gin pangayuan man sila sang bulig nga basi sa bahin nila may mga establishments nga naka kuha sang CCTV footage sang gingamit nga SUV bilang getaway vehicle.
May kabudlayan man abe sa parte sang PNP sa pagkuha sang CCTV footages bangud isa lang ka establishment malapit sa natabuan sang krimen ang may CCTV camera.
Martes sang aga sang gintiro si Li sang gunman nga may pending nga warrant of arrest.
May isa siya ka igo sang bala sa ulo.
Gingamitan siya sang special bullet para masiguro nga mapatay.