Ginguyod balik pa BREDCO port sa Bacolod City ang M/V Weesam Express 6 sang kahapon matapos nga magpahibalo ang kapitan sini nga may problema ang ila nga makina.
Suno kay Negros Occidental Commander Joe Luviz Mercurio may 172 ka pasahero ang fastcraft samtang nagabiyahe padulong sa Iloilo.
Las 11:30 sang aga sang nagbiya sa BREDCO Port ang fastcraft apang gin-report nga nagkaproblema sa makina kag ini natabo sa tunga-tunga sa baybayon sang Bacolod kag Iloilo.
Dugang pa ni Mercurio, pila ka pasahero ang naglain ang pamatyag bangod wala sang bentilasyon kag may masobra 30 minutos pa ang nakaligad sang sila ang nakadtu-an agod i-rescue.
Gilayon nakig angot ang PCG sa Arcturus Tug Boat nga isa ka pribado nga sektor nga naga operate sa Bacolod sakay man ang mga personnel sang PCG para sa towing operation.
Las tres sang hapon sang nakabalik sa BREDCO port ang barko nga gin-guyod sang tug boat kag gina sunod man sang isa pa ka rescue boat.
Sa mga pictures nga kuha ni Arthur Yap makita pa nga gina wheelchair ang iban nga mga pasahero samtang gina papanaug sa fastcraft bangud nag lingin ang ulo.
Nagresponde ang Philippine Red Cross kag mga volunteer groups sa Bacolod para mabuligan papanaug ang tanan nga mga pasahero.
Suno kay Frank Carbon sang Weesam Express, nadagdag ang tubo nga nagakonekta sa propeller rason nga nagka-problema sa pagpaandar sa sakayan.
Gindula man ni Carbon ang kahangawa sang publiko angot sa posibilidad nga matabo sa fastcraft kag ginklaro nga maga-lutaw-lutaw lamang ang sakayan kon matabo nga mapatyan sang makina tungod balanse man ang pundasyon.
Ila gin-refund ang mga pasahero nga wala magsaylo sa ginpreparar nila nga barko.
Ang Phiippine Coast Guard magapatigayon naman sang imbestigasyon sa natabo nga insidente.