Fall Army Worm infestation sa katubuhan sa Iling-iling sa Cabadiangan sa Himamaylan ang gin-report.
Suno kay Nilo Basco Jr., ang Crop Protection Section OIC sa idalom sang Office of the Provincial Agriculturist, sa inisyal nila nga report 80 ka ektarya sang 135 ka ektarya sang katubuhan sang mga magagmay nga planters sa Iling-iling ang apektado sang fall army worms.
Personal na nga nagpadulong man sa lugar si 5th District Congressman Dino Yulo upod ang mga tiglawas sang Sugar Regulatory Administration.
Suno kay Basco, bwas natalana nga mag patuman ang OPA upod sa SRA sang massive spraying para malikawan na ang pag lapta pa sang fall army worms kag tigayon pa nga masalbar ang apektado nga tubo.
Paathag ni Basco ang pag pang atake sang sini nga sahi sang peste ang masami nagakatabo kun malawig ang tig-ilinit kag may pag tupa sang ulan.
Ang duta nga wala na cultivate ukon na arado mahimo tuga sang kalawigon sang tig-ilinit paborable ukon nagahatag sang higayon sa sini nga mga peste nga mag reproduce kag ang pag tupa sang ulan naga tugot naman sa pagbuto sang ila nga mga itlog.
“Wala sang pag-arado, or any activity, that’s why wala sang disturbo sa sina nga mga pests nga mag reproduce ukon mass production. Wala na stop ila cycle. Favorable ang condition sa ila, favorable man ang area nga wala sang intervention sang tawo”, suno kay Basco.
Suno kay Basco, may mga kaiping man nga talamnan sa Cabadiangan ang gin-atake sang peste pero padayon pa nila gina pat-od kun bala ini tuga sang naman sang army worms ukon cut worm.
Ang army worms masami mais ang gina atake suno sa iya.
Gin siling man ni Yulo nga may report man sila sang pag pang atake sang army worms sa pila ka lugar sa Binalbagan kag Isabela.
Gina haylo niya ang mga mangunguma nga gilayon mag report kun may makita nga amo nga mga infestation agudto gilayon nga matatapan sang naga kaigo nga ahensya.