Naga deliberate na ang fact finding team angut sa ila nga pag pangusisa sa ginreklamo pag kapatay sang bag-ong bun-ag nga lapsag sa Bago City Hospital.
Ginsiling ni Mayor Nicholas Yulo nga subong nga adlaw ang deliberation kag mahimo man nga subong nga adlaw iya na mabaton ang recommendation sang fact finding team.
Gin-alegar sang amay sang lapsag nga may yara sang negligence sa bahin sang hospital staff nga amo ang nangin kabangdanan sang pagkapatay sang iya nga anak kag nabutang man sa critical condition ang iya nga asawa.
Dose oras nga nag labor ang iya asawa kag naghinyo na lang nga ipaidalom sa caesarian section pero wala ini ginpamatian suno sa tagreklamo.
Ang iya complaint nangin viral sa social media.
Damlag pa naka padala na sang incident report ang ospital sa alkalde.
Ang City Legal Office ang naga pamuno sa fact finding team.
Damlag pa, ginsiling ni Yulo nga kun mapamatud-an nga may yara sang negligence sa bahin sang ospital may maga panabat.
“Ma deliberate na lang sila subong. Tapos na ang tanan nga interview, ma deliberate na sila, so that they can arrive at a conclusion on the recommendations nga ihatag nila diri sa akon”, suno kay Yulo.