Ginmando ni Bago City Mayor Nicholas Yulo ang imbestigasyon sa reklamo sang isa ka amay nga namatyan sang bag-ong bun-ag nga lapsag sa Bago City Hospital sang nagligad nga semana.
Sa alegasyon sang amay, may kapabayaan sa bahin sang staff sang ospital amo kun ngaa napatay ang iya nga anak kag nabutang sa kritikal nga kahimtangan ang iya nga misis.
Mga 12 ka oras nga nag labor ang iya misis kag suno sa iya bisan pa nag-ayo na ang iya asawa nga ipaidalom na sa caesarian procedure, wala ini ginpamatian.
Dugang pa sang amay, wala man lang siya ginpahibalo nga gin tubuhan na ang bag-ong bun-ag nga lapsag.
Madasig nga nag viral sa social media ang reklamo sang amay.
Kaina sang aga nag submit na ang ospital sang incident report sa alkalde.
Suno kay Mayor Yulo ang City Legal Office sang siudad ang magapamuno sang fact-finding team para mahibaluan kun ano gid ang natabo.
Kun mapamatud-an nga may kapabayaan sa bahin sang ospital nagpasalig ang alkalde nga may manabat.
Nagaupod sa kalisod sang pamilya sang napatay nga lapsag ang alkalde kag nagpasalig nga magahatag sang kun ano man nga suporta nga ila nga gina kinahanglan.