Paglupok sang bulkan Kanlaon ang nagsukat na isa katuig karon nga adlaw.
June 3, 2024 naglupok ang bulkan Kanlaon. Gikan sa Alert Level 1 ginpasaka sa Alert Level 2 ang bulkan.
May mga residente nga na displace kag hugot nga gindumilian ang pagsulod sa 4-kilometer danger zone.
Ang eruption ang gin-record bilang E-type earthquake suno sa PHIVOLCS nga naglawig sang anum ka minutos base seismic record.
Ini ang nagtuga sang 5 kilometer nga kataason sang voluminous eruption column.
Yara karon sa Alert Level 3 ang bulkan. Padayon nga yara sa mga evacuation center ang mga yadtong naga puyo sakop sang 6km radius gikan sa summit sang bulkan.
Samtang, ginsiling ni Office of the Civil Defense Regional Director, Donato Sermeno, III, daku ang nangin epekto sang sitwasyon sa palangabuhian sang komunidad, sa pag eskwela sang kabataan, lakip na ang social kag psychological effect.
May 2,248 ka pamilya ang naga pabilin sa 23 tanan ka mga evacuation center sa Canlaon City, La Castellana, La Carlota City kag Bago City.
Mabudlay pero padayon man ang mga tikang kag papangita sang pamaagi suno kay Sermeno para may alibyo man ang sitwasyon. Isa sa mga ginalantaw nila karon ang pagpahamtang sang mga nipa kag kawayan nga maga serbe nga alterative learning spaces sa mga estudyante, wala labot sa mga canopy tents nga damlag pa gin-request sang LGU La Castellana.
“Kahapon nag meeting kami with the Regional Task Force Commander kag gina explore pa namon ang iban nga pamaagi, lantawon naton kun basi pwede kita ka patukod sang native lang nga materials using bamboo kag nipa. Pero ang problema naton especially dira sa La Castellana kun may space sila na bulutangan sang mga amo na na structures. Lantawon naton. Either siguro classroom kun masugot. Kun obrahon naton na shelter, ibutangan mo pa CR. Kun classroom lang ya simple lang ang mga kinahanglanon”, suno kay Sermeno.