Una nga semana sang bulan sang Hunyo natabo ang ini nga pagkawat sang kable sang internet sa gwa sang isa ka balay sa City Heights Subdivision sa Bacolod City.
Tunga tunga na sang hulyo wala sa gihapon sang internet connection ang tagbalay bangud sang ginpang utod nga mga kable.
Gani bisan naga bayad sang bulanan nga bill, wala sang internet connection, padayon nga naga bayad sang bill sa internet ang tagbalay samtang naga bayad man sa prepaid internet samtang naga hulat nga mabalik ang connection.
Ini ang isa ka example sa halit sang kawatay sang kable. Ginpadangat sang mga telecommunications company ang ini nga problema sa kay Mayor Albee Benitez. Bisan diin sa Bacolod may amo sini nga problema sa karon. Gani indi ma sasa sang mga telcos ang problema.
Ini ang rason kun ngaa nagpagwa si mayor albee benitez sang executive order number 15 nga naga pabakod pa gid sang anti fencing law. Estrikto nga pagpatuman kag pag monitor sang anti fencing law may kaangtanan sa pagkawat sang mga copper kag electrical wires kag iban pa nga transmission line materials ang luyag matabo sang alkalde.
Nasaad sa EO nga ang mga establisimento nga naga balak kag baligya sang indi lisensyado nga dealer ukon supplier ang dapat anay magkuha sang clearance ukon permit sa station commander sang PNP.
Ang Business Permits and Licensing Office ang gina manduan man nga magpatigayon sang regular nga inspection kag i cancel ang permit sang madakpan nga naga supak sang layi.
Samtang may kaangtanan sa gihapon sa mga kable, padayon ang pagpaninlo sang mga spaghetti wires. Halin sa dalan San Juan yara na naka lab-ot sa Luzuriaga Street ang Task Force Spaghetti Wires.
Kahapon amo sini kadamo nga kable ang ila nakuha sa gamay pa lang nga portion sang Luzuriaga Street.
Padayon ang pagpaninlo sang mga lineman.
Pati ang mga gabok nga mga poste ang ginapang kakas naman.
Damlag pa ginsiling man sang pnp nga ang mga naga laylay nga mga kable ang init man sa mata sang mga kawatan kay hapos lang pang utdon.