Isa sa luyag nga tutukan man karon sang Office of the Civil Defense amo nga kumbinsihon ang banwa sang La Castellana nga mag-evacuate sang pumuluyo sini sa Himamaylan City sa Alert Level 4.
Samtang, padayon pa ang pag pangita sang OCD sang iban pa gid nga sarang masayluhan bangud kulang sa gihapon ang mga evacuation centers nga ila na-identify sa karon kun mapasaka sa Alert Level 4 ang bulkan.
Ginsiling ni Task Force Kanlaon Head, Raul Fernandez nga tubtob sa karon wala sang approved nga contingency plan ang banwa sang La Castellana.
Iya ginsiling nga luyag sang banwa nga sa duha ka mga barangay nga malayo na sa radius sang bulkan ang luyag nga ipahamtangan sang mga evacuees.
Pero suno kay Fernandez wala sang specific site kag wala man sang facility ang natungdan nga mga lugar.
Kag sa kadamuon sang iga-evacuate indi manegar nga may spill over ukon indi tanan ang ma accommodate.
Gani sa bahin sang OCD sila sa gihapon ang maga padayon sa paghanda sang Himamaylan tent city kasubong man sa Kabankalan para sa alert level 4.
Sa interview sang Digicast Negros kay Mayor Rhummyla Nicor-Mangilimutan sang Martes iya ginsiling nga tigayon na sila naka submit sang contingency plan para sa nagkalain-lain nga alert level sang bulkan Kanlaon.
Ugaling sa Alert Level 4, may luyag sila iga-revise.
Sa original nga plano, sa Panaad sila maga evacuate, pero indi man sila maka igo rason nga nadala sa plano ang Himamaylan.
Sa revised nga plano luyag nila malakip sa evacuation sites ang Barangay Manghanoy, Nato, Talaptap kag Lalagsan bangud ang ini nga mga barangay indi na sakop sang danger zone sa Alert Level 4.
Dugang pa niya nga luyag kuntani niya sang long term nga solusyon bangud ang Kanlaon maga pabilin kag indi man madula.
Sa pihak nga bahin may mga MOA na nga nalagdaan ang La Carlota, Bago kag Murcia sa iban nga LGU nga maga accommodate sang ila evacuees sa Alert Level 4.
“May ari kami di nga proposal which is pasa ni namon liwat sa ila upod kay Gov. Dala na na ang Manghanoy, Talaptap, Lalagsan kag Nato. Pero na check naman ni nila atong nagligad. Pero kun based lang ya sa contingency kun diin makadto, ma-evacuate, Panaad gid ya ang amon pinaka main nga kaladtuan, indi ma – accommodate kay 10,000 plus ang amon, so mangita kami for the place nga pwede. So kun pwede man lang ma utilize ang outside of 16km danger zone sa amon di, pwede man lang”, suno kay Nicor-Mangilimutan.