Narescue ang duguon nga 13 anyos nga biktima nga babaye sang Martes sa kinutkutan sa sulod sang kampo sa Barangay Campanu-an, Mabinay Negros Oriental.
Nakapanugid ang duha ka mga estudyante nga kaupod sang biktima nga naga lakat sila pa eskwelahan sang hinali na lang nga ginbutong sang 50 anyos nga suspek.
Sa inisyal nga report sang PNP, naka pangayo sang bulig ang duha ka saksi sa mga mangunguma sa area kag nagtinghua nga punggan ang suspek pero iya gindala sa sulod sang kampo ang biktima kag ginlampusan sang bato.
Nagpangayo na sang tabang sa mga tanod kag opisyal sang barangay ang mga mangunguma kag saksi. Ila nakuha ang duguon nga biktima sa buho sa sulod sang kampo.
Ginpalibutan ang kampo para indi makapalagyo ang suspek tubtob nag abot ang mga pulis kag soldado sa malapit nga detachment.
Naaresto siya gilayon.
May record sa barangay ang suspek sang kaso nga pagpangawat.
Ginbayaan na ini sang iya pamilya.
Gina usisa pa sang PNP ang iya nga background kag pasakaan sang nagakaigo nga kaso.
Wala naman matigayon nga mahimuslan ang dalagita base sa findings sang duktor.
Detained ang suspek sa Mabinay PNP.