Liwat nga gin-anunsyo kagab-i ni Presidente Rodrigo Duterte nga kutob na lang sa mga closed kag crowded areas kasubong sang ospital kag sa mga close contact sang Covid-19 positive iga-require
ang pag-gamit sang face shield.
Butang nga ginkalipay naman sang mag-amay nga Pepe kag Jelica Dela Verges bisan pa nagabaligya man sila sang face shield sa downtown area sang Bacolod.
Ginsiling ni Pepe nga mabudlay para sa iya ang mag-ginhawa bangud may edad na amo man para kay Jelica nga nagabusong.
Pero suno kay Dr. Chris Sorongon, deputy for medical data and analysis sang Bacolod Emergency Operation Center, dako ang mabulig sang face shield upod sa pag-gamit sang face mask agud
Mapunggan karon ang pagsaka sang Covid-19 cases kag deaths tuga man sang Covid-19 Delta variant.
Ang katapo sang sangguniang panlungsod ang natalana pa nga magatalakay angut sa ginapatuman nga local ordinance bahin sa mandatory use of face shield karon nga gindeklarar sang Presidente
ang pagkakas sang face shield.
Pero iga-recommend gihapon ni Sorongon nga ipabilin ang pag-gamit ang face shield agud nga mas mapangapinan ang pumuluyo batuk sa Covid-19 infection.
As of September 22, may 1749 ang active cases sa Bacolod kag nagalab-ot na sa 436 ang Covid-19 related deaths.
Pero samtang wala pa maligwat ang natukod nga ordinansa, magapadayon gihapon ang hugot nga pagpatuman sang ordinansa angut sa pag-gamit sang face shield sa mga pampubliko nga lugar sa Bacolod.