Temprano pa nga nagpadulong sa Brgy Mansilingan si Tey Sevilleno para magpabakuna para sa Covid-19 bangud nakapa register na siya online.
Malapit duha ka oras na siya nga nagapila sang ginhambalan siya kag iban niya nga mga upod nga nagapila nga indi sila ma akumodar sang barangay bangud dapat sa barangay mismo sila nagparehistro kag indi online.
Ginhambalan sila sang barangay secretary nga tawgan lang sila kun may yara sang sobra nga bakuna subong nga adlaw.
Ginpahayag ni Dr. Chris Sorongon sang Bacolod Emergency Operations Center nga ang mga nakapa register sa barangay kag online nga health care workers, senior citizens kag mga may comorbidities ang ginahatagan sa karon sang priority.
Pero iya ginapasalig nga ang tanan nga mga nakapa register online nga tubtub subong wala pa mahatagan sang schedule ang mabakunahan gid sa tion nga mag abot na ang 650,000 ka doses sang astrazeneca vaccines nga ginbakal sang siudad kag ginapaabot sa bulan sang hulyo.
Sa karon, nagadepende lang anay ang bakuna sang siudad sa nagaabot gikan sa national government pinaagi sa DOH.
“Ang aton nga numero nagadepende man na sa availability sang aton vaccine ti sa subong sini gamay pa man lang ang nag abot but ang iban naka register May, ang iban April ti basi ang numero mo ara sa 20,000 plus ara sa 30,000 plus ara sa 40,000 plus ti you don’t expect nga ma textan ka kay ang bakuna ta palang nga nabaton wala pa 20,000. So sa 20,000 nga doses nga ina amo palang ang aton na roll out. Rest assured nga mag abot na ang kadam an sang aton bakuna especially ang gin order ni mayor bing nga Astrazeneca nga 650,000 doses I expect naton nga tanan nga nakaparehistro ara na sa priority,” suno kay Sorongon.
Naglibot naman si Bacolod Mayor Evelio Leonardia sa ginapatigayon nga mass vaccination sa mga barangay.
Iya ginakalipay nga madamo na sang mga pumuluyo ang luyag nga magpabakuna kag wala na sang kahadlok.
Plano karon sang siudad nga magdugang sang iban pa nga mga pamaagi sa paghatag sang bakuna sa mga barangay kag subdivision kasubong mobile vaccination.
“Kay nagalibot ko sa nga nagkalain lain nga barangay vaccination centers kag dugang pa gd ang sm nga kadamo didto tawo kag ang ayala nga kadamo man tawo nakita ko may improvement there is no doubt about that although the game is not over because damo pa gyapon ang dapat natun bakunahan but considering nga ang naga alabot palang nga bakuna ang ginahatag ta sa pumuluyo, we are doing quite well,” suno kay Mayor Evelio Leonardia.
Napilian man ang Bacolod bilang isa sa apat ka mga siudad sa pungsod nga mangin case study sang isa ka proyekto sang DILG, DOH kag United Nations Childrens Emergency Fund ukon unicef nga nagatuyo sa pagtuon kun paano masarangan sang isa ka local government unit ang pag manage sang Covid-19 pandemic kag sang new normal.