Bacolod Emergency Operations Center ang nagsapul sa grupo sang media para maghinyo sang bulig sa pagpahangup sa publiko sang benepiyso sang COVID-19 vaccine.
Nagsapul na sang Sabado sa Negros Press Club kag Kapisanan ng mga Brodkaster ng Pilipinas ang Bacolod EOC para maghinyo sang bulig sa information-education campaign para mapahangup ang publiko sang benepisyo sang bakuna.
Magasugod naman sa Biernes ang training sang EOC sa mga doktor sang City Health Office, department heads sang siudad, mga barangay leaders kag health workers.
Sila ang magahimo sang house to house campaign sa mga barangay.
Magapagwa man sang mga poster kag flyers ang EOC para maathagan ang pumuluyo.
Ginpahayag sang Department of Health nga madamo pa sa karon nga mga pumuluyo sa pungsod ang indi gusto magpabakuna para sa COVID-19 bangud sang pagkahangawa.
Suno sa deputy for medical sang Bacolod EOC nga si Dr. Chris Sorongon, tuyo nila nga ipahangup sa pumuluyo kun ano ang bentaha sa pagpabakuna pero indi man nila luyag nga piliton ang pumuluyo bangud voluntary lamang ang vaccine.