Nabaton na ni Bacolod Mayor Greg Gasataya ang sabat sang anay Officer in-Charge kag regular nga empleyado sa karon sang Office of the Building Official ukon OBO nga si Engr. Isidro Sun para sa show cause order nga gindagdag sa iya.
Itugyan naman sang alkalde sa City Legal Office ang iya sabat para matun-an.
Ginpapanaugan siya sang show cause order sang nagligad nga semana matapos makabaton sang reklamo ang CLO nga nagpabayad ini sa isa ka kliyente sang P11,000 nga suhol para ma release ukon mahatagan sang occupancy permit.
Sa mga media interview gina panginwala ni Sun ang alegasyon kag nagsiling nga gina painitan lang siya. Sa report pa sang media niya pa nahibaluan nga may show cause order siya kag indi sa iya immediate supervisor.
Sabat sang alkalde, nag akto lang sila sa reklamo sang isa ka persona batuk sa iya. Kag kuntani magserbe ini nga warning sa tanan nga empleyado nga indi mag akto bilang fixer.