Patay ang isa ka babaye matapos matiruhan sa Sitio Dug-anon, Brgy. Oringao siudad sang Kabankalan sang Domingo sang aga.
Ang biktima ginkilala kay Myrna Belando, 43-anyos, manugbantay sa MagAso resort kag residente sang amo nga lugar.
Suno sa kay Police Captain Joelan Vinson ang Deputy Chief of Police sang Kabankalan City PNP, naga sakay sa iya nga motor ang biktima padulong sa iya nga gina-ubrahan apang ini ang gintiro sang makapila ka beses. Dugang pani Vinson nakuha sa lugar sang insidente ang empty shells sang ginapatihan 9mm pistol. Nagaguwa man sa ila nga imbestigasyon nga antes ang insidente nakabaton na sang pagpamahog sa iya nga kabuhi ang biktima. Mahimo personal nga inaway ang ginhalinan sa pagpatay sa iya suno sa pulis. Sa karon nagapadayon ang imbestigasyon sang kapulisan sa motibo sang krimen.