Lima ka adlaw ang ginhatag ni Bacolod City Mayor Greg Gasataya sa empleyado nga nagwaslik puder sa isa ka ilimnan sa Goldenfield Commercial Complex agud makahatag sang iya bahin.
Ini matapos nga gindagdag na sa natungdan nga empleyado kahapon ang show cause order gikan sa siudad.
Ginsiling ni City Legal Officer Karol Joseph Chiu, drayber sang Joint Inspection Team ang gin reklamo nga regular employee.
Nakasaad man sa show cause order nga sang Hunyo 27, nag inom ang amo nga persona sa isa ka ilimnan kag sang ginsukot na siya , nagpamalibad siya nga magbayad.
Iya man gin-liab ang trabahador sang ilimnan sa atubang mismo sang mga customer, rason nga nagpasaka sang reklamo ang trabahador bangud nahuy-an siya.
Iya man ginsinggitan ang tag-iya sang amo nga ilimnan kag nagpakilala nga katapo sang CLO. Nagpamahog man siya nga ipasara ang ilimnan kun pabaydon siya sang iya mga gin-order.
Suno kay Chiu, kun makasabat na ang empleyado, yara na sa desisyon sang alkalde kun pasakaan ini sang kaso ukon i-suspend.
Samtang, may isa pa ka separado nga insidente kaangay sini ang padayon pa nga gina-usisa sang CLO.
Nagpasiguro naman ang CLO nga manabat ang kutob sa mga empleyado nga nagawaslik puder.
[sibwp_form id=1]