Electric jeepneys igatanyag sang siudad sa katapo sang transport sector nga luyag mangin kabahin sang igatukod nga corporation. Liwat nga nag rally sa Bacolod City Government Center ang katapo sang Bacolod Alliance of Commuters, Operators and Drivers kahapon.
Ini agud iduso ang transport rehabilitation kabaylo sang ginapatuman nga jeepney modernization program ilabi na nga malapit naman mag-expire ang nahatag nga provisional authority sa mga naga biyahe nga traditional jeepneys.
Ginsiling ni Mayor Albee Benitez nga indi na dapat mabalaka ang katapo sang transport sector sa siudad bangud ginahimo na nila ang mga tikang agud nga makapadayon pa byahe ang mga traditional jeepney operators.
Ang alkalde ang naghinyo na sa Department of Transportation kag Land Transportation Franchising and Regulatory Board agud nga makatukod sang korporasyon ang LGU agud nga mabuligan ang mga jeepney operators nga wala pa nakigbahin sa ginapatuman nga modernization program.
Suno kay Councilor Al Victor Espino, pamuno sang Committee on Transportation and Traffic, ginaplano sang siudad nga mabuligan ang mga jeepney operators nga maka avail sang electric jeepneys kabaylo sang mini-bus nga indi masarangan sang kadam-an nga katapo sang transport sector.
Sa karon may masobra na 600 ka mga modernized jeepney nga naga byahe sa siudad. 1, 099 ang target nga modernized jeepney sang siudad kag LTRFB para magserbe sa mga commuters.