Duha ka mga lalaki nga gin alegar sang New People’s Army (NPA) ang napatay sa tatlo ka sunod sunod nga engkwentro sa Barangay Macagahay banwa sang Moises Padilla kahapon sang aga. Ini ang ginkumpirma ni 303rd Brigade commander Brigadier General Orlando Edralin.
Suno sa iya, las 9 sang aga natabo ang una nga engkwentro sa tunga sang 62nd Infantry Battalion kag anum ka gin alegar miyembro sang NPA, nga ginsundan sang duha pa gid ka engkwentro kag ini tanan nagluntad sa isa lang ka barangay.
Dugang pa niya wala sang nagkalapilasan sa tropa sg militar.
Na-recover sang militar ang isa ka M16 rifle, isa ka 12 gauge shot gun, apat ka short magazine assembly para sa M16 kag nanari sari nga mga bala.
Bangud sang encounter nga natabo, 32 ka pamilya ang gin evacuate kag gindala sa Brgy. Macagahay Evacuation center. Gintagaan man sila sang Moises Padilla Task Force To End Local Communist Armed Conflict sang food packs kag hygiene kits kag sa karon tanan sila naka balik na sa ila tagsa ka mga puluy-an. Sang kahapon mismo suno kay Edralin tigayon man nga nakabalik sa ila nga mga puluy-an ang 32 ka mga pamilya. As of press time wala pa nakilal-an ang mga napatay.