Dugang nga personnel, K9 units kag pagtalana sang sea marshall kabahin sang pagpabaskog sang seguridad sa mga seaport sa pagtakop sang holiday season.
Naka-heightened alert tubtob Enero 7 ang katapo sang Philippine Coast Guard sa Western Visayas. Suno kay Commander Jansen Benjamin, operations chief sang PCG sa rehiyon, bangud ginapaabot ang pagdagsa sang mga maga biyahe nga pasahero asta sa una nga semana sang bag-ong tuig, nagdugang na sila sang mga personnel pati na mga K9 units nga magabantay sa mga seaport.
May gintalana man nga sea marshall nga magapasiguro nga hilway ang pagbiyahe sang mga sakayan ilabi na nga may nagapabilin nga low pressure area nga naga-apekto sa Western Visayas.
Kabahin sa mga hugot nga ginabantayan sang Coast Guard ang puerto sang Guimaras-Iloilo kag Boracay-Caticlan nga ginakabig special areas ilabi na karon nga holiday season.