Duha ka mga dugang pa nga Manokan Country ang ginaplano sang Bacolod LGU nga matukod sa siudad.
Ang Manokan Country indi lang makabig atraksyon kundi nangin isa na ka brand nga labi nga ginapabugal sang siudad.
Gani magluwas sa natukod nga Manokan Country sa reclamation area, plano ni Mayor Albee Benitez nga magdugang sang Manokan Country agud mas mapalambo ang food tourism kag economiya sang siudad.
Kabahin sa mga plano ang pagtukod sang Manokan malapit sa Bacolod City Government Center.
Sadto anay ini ang ginhinyo sang mga tenants sang Manokan Country nga masayluhan kun suguran na ang demolisyon sang SM Prime Holding Incorporated para sa joint development project sa reclamation area.
Ang mga tenants sang Manokan ang natalana magabalhin na sa temporaryo nga pasilidad nga gin-construct sang SMPHI sa parking area sang mall sa Hunyo.
Ginatun-an na sang alkalde ang pagpalapad sang lugar agud ma-accommodate ang mga tenants.