May isa nga nadugang nga kaso sang leptospirosis sa siudad sang Bacolod, sa bilog nga Pilipinas masobra sa 2,000 ang na record nga kaso kasunod sang pagbinaha.
Sa morbidity week 31 ukon sang July 27 tubtob August 2 sini nga tuig, may na record nga isa ka bag-o nga kaso sang leptospirosis sa Bacolod City.
Ini base sa record nga gin-release sang City Health Office.
Gani subong, yara na sa 17 ka mga kaso ang na record sa Bacolod humalin sang Enero.
Mas mataas ini sang 21.4% kun ikumpara sa amo man nga period sang 2024.
May anum naman ka mga napatay bangud sang balatian.
Ang Barangay Banago, Handumanan, Felisa kag Mansilingan ang naka record sang tig-duha ka mga kaso.
Ang makamamatay nga balatian ang dala sang bacteria nga ginatawag nga leptospira nga nagaka kuha sa ihi sang sapat nga parehos sang ilaga.
Ini ang makuha sa pag ubog sa baha ukon pag inum sang tubig nga may amo nga bacteria.
Ang Department of Health sang sini gid lamang nagbukas sang specialized leptospirosis “fast lanes” sa pila ka mga government hospitals sa pungsod para mapadasig ang pag bulong sa mga persona nga nag ubog sa baha kag gina suspetsuhan nakakuha sang sini nga balatian.
Sa bilog nga Pilipinas, may 2,396 infections nga na record humalin sang June 8 tubtob August 7, 2025, suno sa DOH.