Pamunuan sang Baciwa-Primewater nagpasalig sa Bacolod LGU sang dugang nga 12 million liters a day nga supply sang tubig sa sulod sang tatlo tubtob lima ka bulan.
Sa ginpadala nga sulat ni Primewater Infrastructure Corporation President Roberto Fabrique kay Mayor Albee Benitez ila ginpasalig ang pag-repair sang 12 tanan ka mga deep wells agud nga maka-produce ini sang dugang nga 7 ka million liters a day ukon MLD karon nga ginkulang ang supply sang tubig ilabi na tig-ilinit.
May yara sila sang ipatuman nga pipelaying projects gikan sa ila nga pumping station sa Forbes Hill Subdivision sa Barangay Estefania agud nga makalab-ot ang dugang nga 2 MLD sa Barangay Mandalagan kag Bata.
Nagpasalig ang water utility sang padayon nga massive leak repair agud bisan paano mabuhinan ang non-revenue water kag ma-convert ini sa dugang nga 2 ka MLD.
Ginapaabot ni Mayor Benitez nga ini ang matigayon sa sulod sang tatlo tubtob lima ka bulan sandig sa pasalig sang pamunuan sang Baciwa-Primewater.
Nagligad lang nga inadlaw sang nagsugod ang pipelaying project sang pribado nga kumpanya para sa dugang nga 5 MLD nga supply halin sa Bocal-bocal springs sa Barangay Alangilan.
Nagapadayon pa ang detailed engineering design sang Bacolod City Engineer’s Office para sa ginadihon nga intake pump system nga i-contruct sa Matab-ang River para sa ginalauman nga dugang nga 20 MLD nga supply sang tubig.