Pamunuan sang e-jeepney manufacturing company ginapaabot nga masuguran ang dry run sa Barangay Cabug sa pihak man sang pagpamalabag sang TODA. Nangin masulhay na ang pagbyahe sang apat ka mga electric jeepney nga gintalana sang Bacolod LGU para sa 5-day dry run sang Barangay Vista Alegre pakadto Burgos nga ruta .
Ang ginaplano nga mangin una nga green route sa pungsod ang suportado sang Jiangsu Fengshuen New Energy Power Corporation nga amo ang nagpahulam sang mga e-jeep para matun-an sang siudad ang pagtukod sang dugang nga duha ka mga rota.
Gina-paabot ni Robert Cerrada, chief operations officer sang manufacturing firm nga masuguran ang dugang nga dry run sa Barangay Cabug sa pagpati nga kun mangin operational na ang mga green routes dako ang mabulig sini sa bahin sang kampanya sa pag-amlig sa palibot.
Kasubong sang una kuntani nga adlaw sang dry run sa Barangay Vista Alegre, ginbalabagan sang mga tricycle drivers and operators ang pagbyahe sang e-jeep sa Barangay Cabug amo nga ginpaiway anay ni Mayor Albee Benitez ang pagpatigayon sang dry run.
Pero sang Miyerkules sang hapon, nag-negosyar ang alkalde sa mga tiglawas sang TODA sa Barangay Vista Alegre resulta nga natigayon ang 5-day dry run.