Isa ka dry run para sa COVID-19 vaccination ang ginpatigayon sang Bacolod Emergency Operations Center sa Barangay Villamonte sini nga hapon.
Ini ang ginsuguran sa pag pick-up sang mga bakuna gikan sa central cold storage facility sang siudad kag pagdala sini sa vaccination area kun sa diin nagatipon na ang mga pagadapatan sang bakuna.
Matapos mabakunahan gindala sila sa isa ka area kun sa diin iga-monitor ang persona sa sulod sang 30 tubtub 45 ka minutos antes pahanugutan nga makapauli.
Pati ang disinfection sang lugar kag disposal sang infectious waste ang nangin kabahin man sang dry run nga gin updan sang city health office, mga barangay health workers kag medical personnel.
Ginaduso sang gintukod nga vaccination council ang pag designate sang lima ka mega vaccination center kag 20 ka community vaccincation centers.
Ginapaabot sa bulan sang hulyo ang una nga batch sang vaccine nga gin order sang siudad gikan sa AstraZeneca.