30-day dry run ginaplano para sa dugang nga rota sang electric jeepney nga maga-byahe halin sa Ayala Malls Capitol Central pakadto Bacolod City Government Center.
Magluwas sa duha ka mga ginaplano nga rota sa Barangay Vista Alegre kag Cabug, gin-recommend sang katapo sang Bacolod Traffic Authority Council ang dugang nga green route ukon rota para sa electric jeepney nga maga byahe halin sa Bacolod City Government Center kag Ayala Malls Capitol Central.
Ginsiling ni Councilor Al Victor Espino, pamuno sang Committee on Transportation and Traffic sang konseho, kabahin sa mga tikang ang pagpatuman sang 30-day dry run sang maga-byahe nga e-jeepney sa dugang nga rota.
Gindugang ni Espino nga ang ginaplano nga dugang nga green route ang magahatag opportunidad sa katapo sang transport sector nga apektado sang ginapatuman nga transport modernization program.
Ini magluwas sa tinutuyo sang Bacolod LGU nga mapabaskog pa ang kampanya angut sa pag-amlig sang palibot gamit ang electric jeepney.