Nagsungka na sang kahapon sa Police Station 4 ang tri-vehicle driver nga nakabunggo kag naka patay sa senior citizen sa Barangay Villamonte, Bacolod City sadtong Setyembre 7.
Suno kay Police Captain Francis Depasucat, hepe sang PS4, nakonsensya ang driver gani nagsungka siya.
Istorya sang driver sa pulis, ulihi na lang siya nakahibalo nga napatay ang biktima nga ginkilala kay Noli Chan, 72-anyos. Suno sa driver, paga-atubangon niya ang kaso nga ipasaka batok sa iya.
Dugang pa sang driver sa talatapan sang PS4, nasaga-id si Chan sang side mirror sang tri-vehicle rason nga natumba kag pilason ang senior citizen. Gilayon nga nagpundo ang driver agud lantawon ang sitwasyon ni Chan apang bangud sang kakulba, nagdiretsona siya.
Posible nga magapangatubang sang kaso nga reckless imprudence resulting in homicide ang driver.
Sa karon, wala pa siya sa kustodiya sang kapulisan bangud natapos na ang reglementary period.
Matapos sang lubong ni Chan, posible nga magapasaka na sang kaso ang pamilya sang biktima batok sa driver.