Nakibot na lang ang driver sang amphibious excavator nga ginagamit sang City Engineer’s Office sa dredging operation sa Mambuloc Creek nga hubas na ang krudo sa tangke sang heavy equipment.
Gani gilayon siya nga nagpahibalo kag nanugid sa kapulisan tubtob nga nagkaladakpan ang duha sa anum ka mga persona nga ginapatihan nagkawat sang krudo.
Tatlo sa lima ka container sang krudo ang na-recover sa ila.
Pero bangud sang pagpangawat na delay ang dredging operation.
Natungod sang insidente naghinyo na ang pamunuan sang City Engineer’s Office sang bulig gikan kay Barangay 2 Punong Barangay Emelda Banguanga nga matagaan atensyon ang pagbantay sang heavy equipment agud nga indi maapektuhan ang ginapatuman nga clearing operation sang sapa.
Ginatinguhaan sang Bacolod LGU nga mahawanan ang sapa agud nga mapahagan-hagan ang problema sa baha.
Humalin kahapon naglab-ot naman sa masobra 26 ka tonelada sang basura ang natigayon nga nahakot halin sa sapa kag nadala sa landfill sa Barangay Felisa.