Department of Labor and Employment nag assume sang jurisdiction sa Central Negros Electric Cooperative tuga sang konplikto sa tunga sang tagdumalahan kag labor union.
181 sa kabilugan nga 320 ka mga katapo sang Ceneco Union of Rational Employees ang nagpabor para sa notice of strike nga gin-file sang labor union sa National Mediation ang Conciliation Board sang nagligad nga bulan.
Gani ginpatuman sang DOLE ang assumption of jurisdiction sa distribution utility agud indi maapektuhan ang serbisyo sa mga kunsomidor.
Bangud man sini indi madayon ang strike sang mga empleyado samtang ginapadasig ang paglubad sang labor dispute.
Sa gin-file nga notice of strike ni CURE Acting President Felix Gepilga, Jr., ginareklamo nila ang posibilidad sang union busting sa idalom sang joint venture agreement sa tunga sang CENECO kag Primelectric Holdings Incorporated.
Indi man nila luyag ang pagpasilabot sang management sa labor union kag ang pagkilala kay Marbie Cabardo bilang acting president sang CURE kabangdanan sang nagaluntad man karon nga konplikto sa tunga sang union.
Gina abi-abi naman sang pamunuan sang CENECO ang assumption of jurisdiction sang DOLE ilabi na nga wala sang madayon nga pag untat trabaho sang mga empleyado.
Kasubong man sini ang ginalauman ni Mayor Albee Benitez para indi maumid ang mga kunsomider sa nagaluntad nga konplikto.
Ginapaabot man sang alkalde nga sa madasun nga bulan matigayon ang plebisito para sa JVA.