Padayon ang pag pangusisa sang Commission on Human Rights sa Himamaylan Massacre kag isa sa kabudlayan nga nasugata amo nga wala sila sa gihapon makabaton sang dugang nga dokumento nga ila ginahinyo gikan sa PNP.
Sang nagligad lamang nga semana nag padulong sa Buenavista sa Himamaylan City ang CHR team sa pag panguna ni Vincent Parra ang head sang CHR Negros Occidental.
Wala sila sa gihapon tigayon naka sugilanon kay Emily Fausto ang nakaluwas nga anak sang mag-asawa nga Rolly kag Emilda Fausto, nga ginpatay sang nagligad nga bulan.
Magluwas kay Emily, gina tinguhaan man sang CHR nga malambot ang duha pa gid ka bata nga babaye sang mag-asawa nga Fausto nga yara naman sa legal nga pang edaron kag isa pa gid ka 18 anyos nga bata nga lalaki.
Suno kay Parra, may nahatag namang gid ang PNP nga mga report ugaling ang bahin sa dokumento nga makabulig sa pagkilala sa suspek ukon mga suspek ang wala pa.
Nahangpan man niya ini, kay wala pa man tigayon nga na file ang kaso pero kuntani importante in isa imbestigasyon.
Sa tion nga ma file na ang kaso maga request na lamang si Parra sa Department of Justice sang kopya sang amo nga mga report.
“May compliance man sa part nila, pero indi complete. Naghatag lang sila ya sang spot report pero ang other documents nga makabulig establish kun sin-o na ang perpetrators, wala sila ya kahatag sa amon.
Te dala na sila sa amon request tani. Ang akon ya pag kwan sina kay te may ara naman sila documents, kay may witnesses, may press con pa gani sila, kun sa akon lang interpretation daw refusal man sa part nila nga mag hand-in sang documents other than sa basic nga spot report”, suno kay Parra.