Sa advisory nga gin pa gwa ni Dr Adriano Suba-an, ang Regional Director sang DOH 6, ang fourth Monkeypox case isa ka 25 anyos nga Filipino National gikan sa Iloilo Province nga nag trabaho sa Iloilo City.
Wala siya sang documented travel history sa pungsod nga may documented confirmed Monkeypox cases.
Sa karon ang pasyente ang gina bulong kag naka isolate sa isa ka ospital.
Ginapatuman man sa karon sang Department of Health Western Visayas Center for Health Development ang close coordination sa mga local government units kag health facilities para mas mapabakod ang surveillance, contact tracing kag referral mechanism lakip na ang management.
Napatigayon na ang contact tracing kag may 14 nga na identify nga close contact.
Ang mga close contact ang gina monitor. Padayon man ang investigation para mapat-od ang source sang infection.
Padayon naman ang pagpatuman sang Provincial Health Office sang tikang angut sa monkeypox.
Suno kay Dr Ernell Tumimbang, ang Provincial Health Officer, plastado naman ang monitoring sang probinsya.
Sa isa ka Zoom meeting Martes sang aga sa DOH 6, may updating bahin sa monkeypox kasubong man ang pagpatuman sang education campaign sa mga LGU. Sa Hwebes maga sapol face to face ang PHO sa mga Municipal kag City Health Officers para liwat nga talakayon ini.
Gina handa ang advisory sa pag adapt sang Memorandum sang DOH angut sa monkeypox. Ginadihon man ang advisory suno kay Tumimbang bahin sa mga tikang nga ipatuman sang LGU kun may monkeypox case.
Nag pakigangut na sa Hospital Operations Department sa pag identify sang ospital para sa amo nga kaso suno kay Tumimbang.