Naga pangaman sa karon ang Provincial Health Officer batuk sa ginakabig nila nga secondary outbreak nga mahimo matabo sa mga evacuation center kag lugar nga apektado sang paglupok sang bulkan.
Suno kay Dr Girlie Pinongan ang Provincial Health Officer, yara sa La Castellana ang mga tiglawas sang Department of Health nga maga patigayon sang tests sa mga source sang tubig sa evacuation center kasubong man sa mga barangay nga apektado sang paglupok sang bulkan.
May donation man nga tubig ilimnon, pero ang gina gamit sa pag hugas sang pinggan kag pag paligo sang mga evacuees ang gikan sa tubig sa mga evacuation center.
Gani luyag nila mapasiguro nga safe man ang tubig nga ginagamit. Luyag nila malikawan ang gastroenteritis.
Pag ubo kag sore throat kasubong man allergies ang pila sa mga na monitor nila nga dala man sang baho gikan sa sulfur emission kag tuga man sang ash fall.
Tungod man sang congestion ukon kagutok indi malikawan ang paglatnanay kun may yara sang respiratory illness.
Gani suno kay Pinongan ila gina pasiguro ang regular nga pag patuman sang consultation.
Suno naman sa Local Disaster Risk Reduction Management Office sang La Castellana may na monitor man sila nga pag sakit sang tiyan sa mga kabataan.
Suno kay Mayor Rhummyla Nicor-Mangilimutan mahimo dala man ini sang pag panginaon sang mga kabataan.
“Ato to subong ang amon team together with DOH Western Visayas ma conduct sila sang water testing sa mga water sources kag lantawon kun ano pa gid didto. Kay ang problema subong ang water sources. Gina bantayan namon ang secondary outbreak especially sa evacuation center, that’s why kun pwede ma avoid ta ina. Basi ma gastroenteritis naman to ang kabataan. Tapos ga ginutok man sa evacuation center kun may respiratory problem basi mag latnanay”, suno kay Pinongan.