Otsenta ka bilog nga dressed chicken sa kada adlaw ang mapaubos ni Nina Bagioso humalin sang nagligad nga sinemana.
Pero karon 60 lang ka manok ang madeliver sang ila nga supplier.
Nagapati siya nga posible epekto ini sang nagapadayon nga banning sa meat kag poultry products sa probinsya.
Suno kay Bagioso, bangud sang kulang nga suppy may pagsaka nga 20 tubto 30 pesos ang presyo sang kada kilo sang whole dressed chicken kag sang assorted ukon special cuts.
Pero ginsiling naman ni Provincial Veterinarian Dr. Renante Decena nga may nagakaigo nga supply sang manok ang probinsya.
Kun basehan ang weekly monitoring sang Provincial Veterinary Office may pagnubo pa gani sang napulo ka presos ang presyo sang kada kilo sang manok sa mga merkado kun ipaanggid sa nagligad nga semana.
Sa northern kag southern Negros yara sa 180 pesos ang kilo sang manok.
Pinaka mahal nga presyo sang manok ang na monitor sa Victorias City nga yara sa 240 pesos ang kilo. Dugang ni Decena nga kun may mga naga siling man nga nag saka ang presyo sang manok, ini ang nasandig na sa marketing transaction sa mga integrators.
2.5 million ang white chicken nga ma produce sa kada bulan. Kun may mga pista man ukon okasyon naga dalagan sa 3 million ang demand, pero ini ang naga ka pun-an sa gina produce man nga colored chicken kaangay sang bisaya nga manok. 70 percent sa demand ang gina pun-an sang gina produce nga white chicken kag 30 percent naman ang colored chicken.