Pagbasura sang Comelec sang election protest ni anay mayor Evelio Leonardia ang parehos lang nga nasirad-an na ang lungon. Ini ang pagkabig sang spokesperson ni Mayor Albee Benitez nga si Atty. Lyzander Dilag sa nangin desisyon!
Para kay Dilag, wala pa man maka first base ang election protest ginbasura na sang second division sang Commission on Elections. Sa desisyon sang Comelec, ginbasura ang petition “for being improperly filed and for being insufficient in form and substance”.
Gin-refer man sang Comelec ang nasambit nga petisyon sa Law Department sang Commission para sa nagakaigo nga imbestigasyon.
Ang election protest, nga gin-file sang kampo ni Leonardia sadtong tinalikdan nga Mayo 20 sa grounds sang lapnagon nga vote-buying, peke nga mga botante, pag-shade sang mga unused ballots pabor kay Benitez, illegal campaigning, presensya sang kapulisan sa polling precincts, falsified election returns kag rekomendasyon sang mga eksperto para sa manual recount kag forensic examination ukon audit bangud sang madamo nga “technical red flags”.
Sa statement naman nga ginpagwa sang kampo sang anay alkalde ila gin siling nga wala pa sila sang kay nabaton nga desisyon kag ila gina kwestyun kun ngaa wala sila na furnish sang kopya sang order kay sila man ang naga serbe nga tagreklamo.