Nahuman na ang Detailed Engineering Design kasubong man ang Cost Analysis para sa ipatukod nga Cadiz City General Hospital.
Suno kay Mayor Salvador Escalante, Jr., tinguhaan nila nga ma submit ini sa Land Bank sini nga tuig kun sa diin sila ang maga kuha sang pondo para sa ipatukod nga ospital.
Suno kay Escalante labing kinahanglanon ang ospital bangud ang Cadiz District Hospital ang naga serbe na nga provincial hospital sang norte gani ang mga dalagko nga medical cases na lamang ang gina cater sang amo nga ospital.
Mga 300 million pesos ang amo nga proyekto, 250 million ang para sa building kag 50 million ang para sa equipment suno sa iya.
May 50 bed capacity ang proposed hospital kag sarang ma expand tubtob sa 100 bed capacity.
Maga lawig sang 14 months ang construction sang amo nga ospital.
“During sang time ni Governor Freddie Maranon, gin-upgrade ang Cadiz District Hospital , now may operations na da so ang mga minor cases wala na nila gina baton. Ang city we have a lying-in clinic, birthing facility na siya. Kun lantawon mo ang health program sang Cadiz, emergency treatment lang sa City Health”, suno kay Escalante.