Yara na sa discretion sang school head ukon mga principal ang pag strategize kun paano mapa hagan hagan ang epekto sang kainiton sang panahon sa mga estudyante kag bisan pa sa mga manunudlo.
Suno kay Ian Arnold Arnaez ang spokesperson sang DepEd – Negros Occidental, indi man pwede maka pa gwa sang uniform nga rule ang DepEd bangud lain-lain man ang sitwasyon sang kada eskwelahan.
Ehemplo diri mga eskwelahan sa kabukiran lain man ang sitwasyon sang yara sa siudad.
Ang importante lang nga may yara sang learning continuity plan ang ipatuman.
Gani kun mas palip-uton ukon mag shift gikan sa face to face padulong sa modular ukon online distance learning para mapangapinan ang ikaayong lawas, yara na sa discretion sang principal suno kay Arnaez.
Ginapaabot nila nga sa bulan sang Abril nga mas maga init pa gid ang temperatura, mahimo nga may shift na gikan sa face to face.
Sa karon nga may mga na report nga pag trangkaso sa mga kabataan pero indi pa man tuman.
“Depende sa condition nila kag depende kun ano ang ila diskarte para indi sila matam-an sa eskwelahan. So wala sang across the board nga one rule para sa tanan. Kun kinahanglanon nila nga mag shorten so let it be nga mag shorten sila. Pero, expecting pakadto sa April nga mga binulan kay nagapasaka naman gid ang temperature subong”, suno kay Arnaez.