Department of Education ang labing naga abi-abi sa mga estudyante sa pagbukas sang klase sa Lunes, Hunyo 16.
Suno kay DepEd Negros Occidental Division Spokesperson, Ian Arnold Arnaez, padayon ang ila nga pahanumdom sa mga ginikanan nga wala sang balayran nga gina sukot ang mga eskwelahan.
Indi man required ang mga uniporme sa kabataan.
Ang importante suno sa iya nga may nagakaigo nga bisti ang bata sa iya nga pagsulod sa klase.
Dala man sang isa ka semana nga Brigada Eskwela, na plastar na ang mga kinahanglanon sa eskwelahan lakip na nga naga kaigo nga seguridad sa mga kabataan.
May mga 325,000 ka kabataan sa idalom sang Negros Occidental Division ang ginapaabot magbalik eskwela sa Lunes.
Sa probinsya sang Negros Occidental may 1,100 ka mga pulis ang gin-deploy sa pag pasiguro nga masulhay ang pagbukas sang klase.
Sa Bacolod City ang Bacolod Traffic and Transportation Management Department ang nag pakig-angut na sa mga barangay bahin sa deployment sang traffic personnel labi na sa mga eskwelahan kag mga lugar nga may gina patuman nga road construction.
Ini sa pagpasiguro sang dalagan sang trapiko.
“Siempre sa mga bata, welcome back sa aton nga school year. Ang importante ang ila nga edukasyon ang tutukan nila, magtuon sang todo, rather than ang iban na butang”, suno kay Arnaez.