Kaso sang dengue sa probinsya ang nagdangat na sa 2,800. Kun ipaanggid sa kasubong nga tion sang nagligad nga tuig, mataas sang 183 percent ang kadamuon sang kaso subong nga yara sa 2,822 recorded cases. Pero, paathag ni Dr Girlie Pinongan ang Provincial Health Officer nga sa ila nga updating sa mga municipal kag city health officers lakip na chief of hospitals kahapon, indi na kasubong kadamo sang dengue cases sa mga ospital karon. Bisan gani ang mga dengue lanes indi na puno. Ang dugang nga dengue ward sa Cadiz District Hospital indi man tuman kadamo sang pasyente. Iya ginsiling nga ang pagsaka sa kaso sa ila nga August 24 nga report dala man sang late nga pagsulod sang datus.
Ang banwa sang Hinoba-an ang may pinaka madamo na record nga kaso – 314. Nagasunod naman ang siudad sang Sipalay nga may 222 cases kag Bago nga may 207 cases. Nagapabilin sa anum ang dengue related deaths. Pero wala naga kumpiansa ang PHO. Padayon ang ila kampanya kontra dengue.
“Saka ang cases pero nag meeting ko together with the Municipal and City Health Officers with Chief of Hospitals, kun ang cases sa ila nga area sige pa saka. With Hinoba-an as number 1, naghambal ang ila nga MHO nga amat-amat gapanaog ang ila nga cases. So gina bantayan namon. Kay actually may reports nga late siya abot, although ina siya para sa ina nga week late siya nag-abot sa PHO. Pero ang sa ospital naman indi na amo na ka damo as compared sang previous nga weeks nga damo-damo sa aton triage, especially nagbutang ta dengue fast lane”, suno kay Pinongan.