Demolition sang illegal structures sa sapa sa Barangay Pahanocoy gina-recommend sang Bacolod Task Force Baha agud mapahagan-hagan ang problema sa baha.
Sang nagligad pa nga tuig sang naghinyo si Councilor Thaddy Sayson nga mausisa ang gin-construct nga overflow nga nagasablag sa Kabiguan Creek nga amo ang ginatudlo rason sang pagbaha sa pila ka mga purok sa Barangay Sum-ag kag Pahanocoy.
Sa aerial survey nga ginpatigayon sang Task Force baha nga ginalakipan sang City Engineer’s Office, DPWH kag City Legal Office nakit-an nga indi gilayon maka-gwa ang tubig pakadto sa baybay bangud sang mahinay nga outfall nga tuga sang natukod nga overflow.
Ginsiling ni City Legal Officer Romeo Carlos Ting, Jr., nga wala sang permit ang construction sang overflow nga yara sa pribado nga propiedad.
Gani nag-recommend na sila sadto nga ma-demolish ang ginakabig illegal structure.
Padayon ang negosasyon sang Bacolod LGU sa property owner sa tuyo nga matagaan atensyon ang pagpatuman sang tikang para masolusyunan ang pagbaha.
Samtang, ginpahayag ni DPWH District Engineer Abraham Villareal nga may plano na para sa construction sang separado nga drainage project sa Bangga Tomaro kag Bangga Aning agud nga masolbar ang pagbaha sa amo nga barangay.