Demolisyon sa mga nabilin nga illegal structures sa Barangay 12 sa Bacolod dayunon sa Enero 28.
Wala sang plano si Mayor Albee Benitez nga ipaisol ang natalana nga demolisyon sa Barangay 12 sa Bacolod sa Enero 28.
Ini bisan pa nagatuyo kuntani si Barangay 12 Punong Barangay JR Alcantara upod sang 22 ka mga pamilya nga apektado sang natalana nga demolisyon nga maghinun-anun sa iya.
Ginpahayag sang alkalde nga sang nagligad pa nga tuig nga natagaan sang panahon ang mga residente nga makasaylo sa gintalana nga relocation site.
Tanan sila ang nakabaton naman sang financial assistance gikan sa siudad.
Sa ginpatigayon nga pre-demolition conference sang katapo sang City Legal Office Enforcement Team, nag-ayo ang mga apektado nga pamilya nga kuntani ma-reschedule sa madason nga bulan ang pagkakas sang ila mga puluy-an nga ginakabig illegal structures sa likod sang Manokan Country.
Tuyo sang SM Prime Holdings Incorporated nga masuguran na ang pag-develop sang kapin 3-hectare property nalakip diri ang Manokan nga ila gin-rentahan sa Bacolod LGU.