Ginlikawan sang driver sang LBC delivery van ang nagtabok nga karabaw sa national highway malapit sa Cadiz District Hospital, Barangay Daga sa syudad sang Cadiz, Negros Occidental, mga pasado las kwatro, kaina Miyerkules sang kaagahon.
Apang, sa iya paglikaw, may nagapadulong nga delivery truck sang softdrinks. Nabungguan sang delivery van ang delivery truck kag natumba ini.
Nagresulta ang insidente sa kamatayon sang pahinante sang courier company.
Pilason man ang tagsa ka driver sang duha ka mga salakyan kag sila ang gindala sang Cadiz DRRMO sa ospital.
Suno kay Lt. Col. John Joel Batusbatusan, hepe sang Cadiz PNP, yara pa sa ospital ang driver sang delivery van, apang outpatient naman ang driver sang delivery truck kag siya ang temporaryo nga gindala sa police station.
Padulong sa Bacolod ang salakyan sang courier service, samtang nagapakadto sa Cadiz ang delivery truck sang softdrinks.
Suno kay Batusbatusan, posible nga nakabuhi ang karabaw sang ini ang nagtabok sa dalan bangud wala man sang tawo nga upod ang sapat sang nagluntad ang insidente.