Ang Carvic Area sa atubang sang isa ka mall sa Barangay Mandalagan isa lang sa mga flood prone area sa Bacolod nga gin inspeksyon nanday Councilor Pao Sy kag Councilor Vladimir Gonzalez kaupod sa katapo sang DRRMO kag City Engineers Office.
Suno kay Gonzales nagsupon na ang mga basura sa drainage kag madamo na sang sagbot nga nagasablag sa malapit nga sapa amo kun ngaa madasig nga nagasaka ang tubig baha sa mga pamalay.
Gani sini nga semana pagasugdan sang natukod nga task force baha ang pag rehabilitate sang sapa kag drainage system pinaagi sa clearing kag declogging operation.
Suno man nga tagaan atensyon sang inter-agency task force ang pag ubra sang drainage sa dalan Gatuslao sa Barangay 3 nga masami man ginabaha kun mag ulan.
Nalakip man sa plano sang siudad ang pagpalapad sang Mambuloc Creek agud man masolusyunan ang baha sa downtown area.