Ang death rate nga na record sa bulan sang Setymbre may kaangtanan sa Covid-19 sa Negros Occidental ang pinaka mataas.
Ini sandig sa record sang probinsya kag suno kay Provincial Administrator Rayfrando Diaz padayon pa nga nagasaka.
Humalin Setyembre 1 tubtob 22, 161 ang na record nga napatay may kaangtanan sa Covid 19. Pinaka damo nga na report nagkalamatay sa isa ka adlaw ang na record sang September 15 kag 17, 26.
Suno kay Diaz, kalabanan sini sa ila may mga co-morbidity ukon may mga ginabatyag na nga balatian.
Pinaka mataas man subong ang positive rate. May adlaw nga masobra sa 300 ang ma record nga new cases.
Puno ang mga healing facility sang probinsya nga naga baton na sang indi masarangan sang mga quarantine facilities sang tagsa ka LGU.
Ang EB Magalona Healing Center may mga 180 ka occupants, 120 naman ang sa Cadiz, 55 ang sa Mambukal kag masobra sa 150 ang sa Silay. Wala naga untat ang panguluhan probinsyal sa pagpahanumdom sa pumuluyo nga ipaiway na ang mga indi importante nga hilikuton kag mag tenir na sa tagsa ka puluy-an, kasubong man ang pagsunod sang health protocols.